LAOAG CITY – Kalikagum dagiti Filipino athletes ti agballigi kontra iti napigsa a kompetision iti 5th Asian Para Games a nangrugi iti rabii ti Domingo, Oktubre 18 iti Paloma Mizuho Sports Park diay Nagoya, Japan.
Makipaset ditoy ti 69 athletes iti 18 a benneg iti continental competition no sadinno nagserbi kas flag bearer da Lhey Manginsay iti table tennis ken Allain Ganapin iti taekwondo iti opening ceremonies.
Simrek ni Manginsay iti inaugurals a nagun-odna ti 11-9, 12-10, 11-1 a balligi kontra ken ni Nadima Nurbekova iti Tajikistan iti women’s singles class 9 iti tables tennis iti Sky Hall Toyota idi kalman, Oktubre 17.
Gapu ta addaan laeng ti walo a partisipante iti kategoriana, naipasigurado ni Manginsay ti quarterfinal spot-na.
Malaksid ken ni Manginsay, immabante met ni Smith Billy Cartera iti round of 16 iti men’s singles Class 4-5.
Iti met Rainbow Pool iti Nagoya City General Gymnasium, indauloan ti veteran campaigner a ni Ernie Gawilan ti Philippine team a kalikagumda met a makagun-od ti balitok.
Maysa met a manamnama a mabuya ket ni wonder girl Angel Otom, maysa a triple-gold winner iti ASEAN Para Games idi napalabas a tawen diay Nakhon Ratchasima, Thailand.
Kabayatanna, kalikagum met ti Philippine cycling team a makagun-od ti qualifying games iti 2028 LA Paralympics ken ti para powerlifters ket target-da ti podium finish.
