LAOAG CITY – Kumpleton dagiti amin a doktor kadagiti Rural Health Unit ditoy siudad ti Laoag.
Segun ken ni Dr. Rodrigo Catcatan, mangidadaulo iti City Health Office ditoy siudad nga awan met ti agbalbalin a pending kadagiti aktibidadda gaputa adu metten dagiti katulunganna a doktor.
Kinunana a manipud kadagiti Rural Health Unit I, II ken iti Rural Health Unit III ket addaan dagitoy ti doktorna, no sadinno dakkel a katulunganda dagitoy iti panang-monitor iti salun-at dagiti residente ditoy siudad.
Inbatadna nga agtultuloy dagiti maisaysayangkat nga aktibidada kas kadagiti pannakaiwayat ti medical check- up kadagiti nagduduma a barangay ditoy siudad.
Mainaig iti daytoy, inpasigurado ni Catcatan ti pannakaidanon tulong medical kadagiti tunggal barangay ditoy siudad gaputa adda dagiti sumagmamano a residente a marigatan nga agturong iti opisinada kas kadagiti senior citizen ken dagiti adda sagsagabaenna a rangkap iti bagina.
Kabayatanna, inpanamnama ni Dr. Catcatan ti agtultuloy a panagtrabahoda tapno ad-ado pay ti maserbianda ditoy siudad ti Laoag.
