Kiniddaw ni Vice Mayor Rey Carlos Fariñas ti pannakaadal iti posibilidad a panangipatungpal ti one-way traffic scheme wenno panagbalin a maysa laeng ti direksion ti trapiko iti McKinley Street ken Lagasca Street iti siudad ti Laoag.
Segun kenkuana, daytoy ket tapno makatulong a mangkissay iti nakaro a trapiko, nangruna kadagiti rush hour no sadinno nga agdudupudop dagiti ado a lugan iti kalsada.
Inbatad na a daytoy ti maysa kadagiti rason ti problema ti trapiko ket ti kaadu dagiti lugan ken ti kaadda dagiti nakaparada a lugan iti asideg dagiti interseccion a mangitunda ti panagkaro ti trapiko.
Gapu iti daytoy, ikonsiderar ni Vice Mayor Fariñas a maysa kadagiti mabalin a solusion ket ti panangipatungpal ti one-way traffic scheme, wenno panangurnos iti direksion ti panagdaliasat dagiti lugan iti nasao a kalsada.
Mainaig iti daytoy, kiniddawna ti pannakaadal daytoy bben ti maysa a trial period tapno makita no makatulong daytoy a mangpasayaat iti annayas ti trapiko, nangruna kadagiti rush hour.
Nupay kasta, impaganetgetna a masapul nga umuna ti pannakakonsulta dagiti apektado a residente ken dagiti sabali pay a mairaman a sektor sakbay a mangaramid iti aniaman a desision.
Ti nasao a suhestion ket maisubmitir iti Committee on Transportation tapno maadal no ania ti kasayaatan nga aramiden a mangrisut iti problema ti traffic congestion iti nasao a lugar.
Kabayatanna, namnamaen ti bise mayor a babaen iti nasayaat a panagplano ken pannakikoordinar kadagiti apektado nga umili, maiturong iti nasaysayaat a panagdaliasat dagiti lugan ken masalakniban dagiti motorista ken dadduma pay nga agus-usar kadagiti nasao a kalsada kontra iti aniaman a disgrasia.
