LAOAG CITY – Inrakurak ni dati a Department of Public Works and Highways (DPWH) Bulacan 1st District Engineer Henry Alcantara iti panagdengngeg ti Sandiganbayan 3rd Division para iti kaso a plunder kontra ken ni dati nga House Speaker Martin Romualdez a ngimmato iti 25% manipud iti 20% ti kickback a maal-ala iti infrastructure projects idi nagtugaw kas House Speaker ni Romualdez.
Iti testimonia ni Alcantara, nangrugi idi 2022 ti maipagarup a 20% kickback rate ni dati a Congressman Zaldy Co idi panawen nga House Speaker ni Senador Alan Peter Cayetano wenno idi panawen ni dati a Congressman Lord Alan Velasco.
Kabayatanna, ngimmato iti 25% ti kickback rate ni Co idi 2023 National Expenditure Program nga idi 2022 pay nga insagana no sadinno a nagbalinen nga House Speaker ni Romualdez.
Nupay kasta, awan met ti maisungbat ni Alcantara idi saludsuden ti korte no apay a kellaat nga arig naaddaan ti “inflation” iti maal-ala a kickback rate ni Co.
Maipalagip nga agpada nga akusado da Romualdez ken Co iti kaso a plunder a rumrummuar nga insubmitir ni Alcantara ti listaan dagiti proyekto ken ni Co idi 2021 kasukat ti 20% kickback a maipagarup nga in-deliver met ni Alcantara ken ni Co idi Pebrero 2022.
