Manarimaanen ti pannakaiproseso ti maipila a kaso kontra iti subject ti illegal drug buy-bust operation ditoy siudad ti Laoag.
Basar ti Philippine National Police ditoy ciudad ti Laoag, sumango ti suspek ti kaso a panaglabsing ti Republic Act 9165 wenno ti Comprehensive Dangerous Drugs Act of 2002 ken ti Republic Act 10591 wenno iti Comprehensive Firearms and Ammunition Regulation Act.
Immunan a nabigbig ti suspek a maysa a lalaki, agtawen ti 43, pintor, awanan asawa, taga Brgy. 1, San Lorenzo ditoy ciudad ngem agdama nga agnanaed ti Brgy 30-B, Sta. Maria ditoy ciudad.
Maipalagip a kinemmeg a dagus dagiti otoridad ti suspek kalpasan a naglako iti maysa a police poseur buyer ti maysa a plastic sachet a naglaon ti mapapati a shabu nga agdagsen ti 1.6 a gramo ken addaan ti standard drug price a P10,880.
Iti panangkapkap dagiti otoridad ket nakumpiskar pay iti ikotna ti 6 a plastic sachet ti mapapati a shabu nga agdagsen ti 7.4 a gramo ken agbalor ti P50,320.
Naala pay dagiti otoridad ti sumagmamano a paraphernalia ken dadduma a gamit ti suspek kas ti maysa a pink sling bag, kahon ti sigarilyo, maysa a balisong, maysa nga stainless tactical knife, 13 a bala para ti cal.45 a paltog, maysa a genuine P1,000 bill, dua a peke a P1,000-bill a nausar kas boodle money, maysa caliber 38 nga awanan ti ejector rod ken crane, maysa a selpon, maysa a lighter, ken ti personal a kuarta ti suspek nga umabot ti P1,927.
Iti agdama, nagtalinaed ti suspek iti Philippine National Police ditoy ciudad ti Laoag.
