Nangipatulod ti Pilipinas ti 32,000 a pedaso ti presko a buko iti Liberia idiay Africa iti babaen ti panagtitinnulong ti Department of Agriculture (DA) ken Abante Agri-Products Philippines Inc., a possible a mangilukat ti baro a merkado para iti produkto a niyog iti pagilian.
Inbiyahe ti kumpanya a nakabase iti Davao City dagiti buko a maiturong iti Monrovia a kabisera ti Liberia, usar ti dua a 40-foot refrigerated container.
Mapatta-patta a 50 a metriko tonelada ti pakabuklan ti kargamento nga agbalor ti $22,400 maibasar iti Free on Board (FOB).
Iti kada container ket addaan ti 16,000 a pedaso ti buko a naikabil iti 800 a sako, nga addaan ti sag-20 a pedaso ti tunggal sako.
Babaen ti tulong ti Ministry of Agriculture ti Liberia, naikeddeng a maibunong kas donasyon dagiti buko kadagiti rural area tapno suportaran dagiti feeding program ken mosolbar dagiti kasapulan dagiti pamilya.
Segun iti Department of Agriculture, mabalin nga agserbi a gundaway tapno makastrek dagiti produkto a niyog ti Pilipinas iti merkado ti akin-amianan a paset ti Africa, mapalawa dagiti pagilian a pakailaklakoan dagiti produkto a pang-agrikultura ken makaparnuay ti nayun nga oportunidad para kadagiti mannalon ken exporter.
