LAOAG CITY – Inbatad ni Phillipine Councilors League (PCL) Ilocos Norte Chapter President a ni Kitchel G. Pungtilan a nangibagi ken ni Governor Cecilia Araneta Marcos iti Techgrow Summit, iti panangaprisiar ti gobierno probinsial iti Department of Science and Technology (DOST) ti panangisangpetna ti North Luzon Technology Transfer and Innovation Summit ditoy Probinsia.
Segun ken Pungtilan a ti nasao a summit ket napateg tapno makapagkikinnammayet dagiti unibersidad, industria ken gobierno tapno makapagsisinnukat kadagiti baro nga ideya, tapno dagitoy ket mapagbalin a praktikal a solusion a mabalin a pakabenepisiaran dagiti komunidad.
Kunana a ti siyensia, teknolohia ken inobasion ket addaan ti napateg a kontribusion tapno mapabileg ken mapapigsa ti ekonomia, kasta pay dagiti kabaruanan a ramit ket mausar para iti pannakaipapintas iti biag, mangipaay oportunidad, mangsuportar kadagiti lokal a negosio ken mang solusion kadagiti parikut a sangsangoen dagiti umili.
Segun kenkuana, napateg ti kolaborasion dagiti unibersidad, research institutions nga addaan kadagiti expertise a mangaramid iti kabaroanan nga ideya ken dagiti industria a makatulong a mapagbalin dagitoy a produkto, serbisio ken solusion
Innayuna a ti gobierno ket isu ti akin responsibilidad iti pannakaipalawa ti siyensia ken innobasion.
Kabayatannam inpanamnamana ti panangipaay ti suporta ti gobierno probinsial dagiti inisiatibo a mangitantandudo iti edukasion, skills development, entrepreneurship, ken panangpadur-as iti ekonomia.
Innayuna a babaen iti panakipagtrabahoda kadagiti kabinnuligda ket makatulong a mangallukoy kadagiti ilocano a mangarakup kadagiti kabaruanan a teknolohia.
