Naglikudan ni Barangay Capt. Glenda Raquinio, ti Barangay 34-A Gabu Norte ditoy siudad ti Laoag ti maipagarup a panagkolekta na ti P50 kas bayad ti Certificate of Indigency ken ti panakaikkat ti maysa a barangay tanod a saan a dimmalan iti umno a proseso.
Inlawlawagna a makagun-od dagiti bumaranggay ti libre a sertipikasion kas koma kadagiti Certificate of Indigency, first time job seeker, ken kasapulan a dokumento dagiti senior citizen.
Impettengna a ti laeng masingsingir ti P50 ket ti dokumento para iti residency no sadinno a naiget ti pammilinna kadagiti padana nga opisial a saan nga agsingir ti Certificate of Indigency.
Mainaig iti daytoy, inlawlawagna pay a naikkat ti tanod ngem dimmalan daytoy iti umno a proseso.
Naikkat ti nasao a tanod gapu ta adda naawatda a reklamo manipud ti maysa nga estudiante no sadinno a kabayatan ti panag-review na ket adda dagiti nagriri nga agiinom iti mismo a pagtaengan ti tanod.
Apaman ti panagturong ti kapitana iti pagtaengan ti tanod, ditoy a napagsardeng dagitoy a rason a nakagura dagiti agiinom.
Gapu iti daytoy, impettengna a ti tanod ti mismo a nagperma iti resignation letter-na.
Naamoan a malaksid iti dua nga akusasion, adda ti imbilin ti kapitana a kabagian na nga agdalos iti barangay hall ngem kunana a daytoy ket kada Sabado laeng nga agdalos ken iso ti mangkitkita kadagiti alikamen iti barangay hall-da.
Nupay kasta, innayonna a nabara ti politika iti barangay da nga isu ti makitana a rason dagiti alegasion kontra kenkuana.
