Kinumpirmaran ni Brgy. Chairman Froilan Agamanos iti Brgy. Lubnac iti ili ti Vintar a karaman ti maysa a barangay kagawad na a nakemmeg ti anti-illegal gambling operation ti Philippine National Police iti nadakamat nga ili, ngem daytoy ket naglibas.
Inbatad na a basar ti palawag kenkuana ti kagawad a binigbigna a ni Mr. James Calantes, nagturong iti maysa a minatayan tapno pagsardengen dagiti agsusugal.
Nupay kasta, kunana nga iti panagtugaw ti kagawad ket maipagarup nga isu metten ti isasangpet dagiti kameng ti pulisya, no sadinno a karaman daytoyen nga inarestar dagiti otoridad.
Inpakaammo pay ti kapitan a gapu ti nerbiyos ti kagawad ken butengna ket naiwadagna ti maysa kadagiti pulis nga isu metten ti gundaway a a nagtaray.
Mainaig iti daytoy, inbatad ti kapitan a nabayagen a balballaaganna dagiti kabarangayan na nga isardeng ti nasao nga illigal nga aktibidad ken adda met dagiti nadutokan nga ag-monitor.
Kabayatanna, kuna ti kapitan a no mapaneknekan a nagsugal ti kagawad ket saanna a kanunungan daytoy ken rumbeng laeng a matiliw.
Segun kenkuana, adda ti 4 a natiliw idinto a dagiti dadduma ket nakalibas.
Basar met iti report ti Philippine National Police, umabot ti sumurok-kumurang P20,000 ti balor ti pusta dagiti nakipartispar iti sugal.
Kabayatanna, nagturong ti Bombo Radyo ti Philippine National Police iti ili ti Vintar ngem awan ni PMaj. Joefel Pascual ken saan nga agsungsungbat ti tawag kenkuana.
