Nilappedan ti maysa a Pilipino iti Mactan-Cebu International Airport nga agturong kuma iti Russia para iti maysa a security-related a trabaho.
Inbatad ti Bureau of Immigration (BI) idi kalman, Oktubre 25 a nilappeddan ti agtawen 50 a Pilipino nga agbiahe kuma iti Vietnam idi Oktubre 10.
Basar iti imbestigasion nga idi kwinestionaran ti pasahero ket nagpudno nga agturong kuma daytoy ti Russia para iti job offer kas K9 handler.
Naamoan a na-recruit daytoy iti babaen ti maysa a social media application no sadinno nakikomunikar ti recruiter para iti nadakamat a job offer a maipagarup nga adda binulan a sweldo a US$3,500 sakbay daytoy a nakaawat dagiti travel document.
Inbatad pay ti Pilipino nga inbilin ti recruiter agpammarang a turista ti pasahero ken ilimed ti aniaman nga adda pakainaiganna ti job offer.
Insigida met a dimmalan iti kustodiar ti Inter-Agency Council Against Trafficking (IACAT) ti pasahero para iti ad-adda a naiget a panagsukimat iti maipagarup a recruitment scheme.
Mainaig iti daytoy, nagballaag ti Bureau of Immigration kontra kadagiti kwestionable nga overseas offers aglallalo kadagiti mangbilbilin kadagiti recruiters nga ilimed ti umno nga intension ti panagbiahe wenno ti panangilimed ti aniaman nga adda pakainaiganna iti recruitment.
Binalakadan pay ti ahensia dagiti aggandat nga agtrabaho iti ballasiw-taaw a tingitingen a nalaing iti babaen ti Department of Migrant Workers (DMW) dagiti job offers tapno masigurado a lehitimo ken kompleto dagiti dokumento para iti recruitment sakbay nga agbiahe.
