Inalay-ayan ni Atty. Donato Balderas Jr., ti Department of Education Supt. iti llocos Norte ti panagamak dagiti nagannak iti Sta. Rosa National High School iti ili ti Sarrat mainaig ti maipagarop a panagsublin ti principal a ni Mr. Rocky Ballesteros intono Nobyembre 4 ita a tawen.
Ti nasao a principal ket immunan a naiserbian ti warrat of arrest gapu iti kaso na a sexual assualt ken 2 counts ti acts of lasciviousness.
Temporaryo a nawayawayaan ti nasao a prinsipal kalpasan a nakapagpiyansa ti P338 a ribo a pisos.
Segun ken ni Atty. Balderas, awan pay ti inpila ni Ballesteros a reinstatement na kalpasan a nag-leave iti dua bulan.
Iti baet daytoy, inkalintegan na a gapu ta saan pay a nasentensyaan a guilty ni Ballesteros ket karbengan na ti mangipila ti reinstatement na kalpasan iti dua a bolan a panag-leave na, ken saan a mabalin a lapdan ti siasinno man.
Innayon ni Balderas nga agpapan ita ket saan pay a nagpakita ni Ballesteros iti opisina na.
Mainaig iti daytoy, inpakaammo ni Balders a naipasan ti kaso ni Ballesteros iti Department of Education – Regional Office ken iyur-uray da ti agbalin a desisyon ti opisina no ania ti possible a maipatawa a pannusa kontra iti nasao a prinsipal.
Inrakurak na a maysa kadagiti option a makitkitaa da ket ti pannakaikkat ni Ballesteros iti pagadalan nga idaulwan na tapno maliklikan ti pannakairisgo ti maitudtudo a biktima ti nasao a prinsipal ken ti pagadalan.
Maipalagip a namonganay ti kaso ti nasao a prinsipal kalpasan ti maipagarop a panangipost na ti sensitibo a ladawan ti maysa nga estudyante iti nasao a pagadalan, ngem immuna metten a naglikudan daytoy ni Ballesteros ken inpetteng na a na-hack ti account na idi napasamak daytoy.
