LAOAG CITY – Agtalinaed a maipalubos iti pannagna dagiti e-bikes kadagiti amin a kalsada ditoy probinisa.
Daytoy ti inbatad ni Mr. Cocoy Dela Rosa, District Officer ti Land Transportation Office ditoy siudad ti Laoag kalpasan nga awan pay ti naiyetnag nga implementing rules and regulation manipud iti Department of Transportation pakaseknan iti pannakaipawil dagiti e-bikes kadagiti sumagmamano a kalsada ditoy probinsia.
Innayonna a maipalubos pay ti panagusar dagitoy a klase ti behikulo uray saan pay a naiparehistro gapu ta awan met pay ti linteg a mangimanmandar iti daytoy.
Nupay kasta, kunana a no adanto ti pannakaawatda ti pammilin mainaig iti daytoy a banag ket saanda nga insigida a maiyemplementar tapno maliklikan panagreklamo dagiti motorista a saan a naipakaammo kadakuada daytoy a banag.
Kabayatanna, kiniddaw ni Dela Rosa ti panagan-annad ti publiko gapu iti kaadda dagiti insidente a nakairamanan dagiti e-bike.
Maipalagip nga iti Metro Manila ket addan ti naiparuk-at a mandato a pannakaipawil ti pannagna dagiti e-bikes iti sumagmamano a kangrunaan a pagdalanan ken kasta payen ti mandato a mairehistro dagiti nasao nga e-bikes.
