LAOAG CITY – Kinondenar ti defense team ni dati a Presidente Rodrigo Duterte ti kiddaw ti prosekusion ti International Criminal Court (ICC) a maaramat kas ebidensia dagiti nagbalin a testimonia dagiti dua a testigo iti kaso a crimes against humanity a sangsangoen ti dati a Presidente.
Kinunana ti depensa a masapol a dumalan dagiti dua a testigo iti cross-examination wenno panagsaludsod tapno masigurado ti kinapudno dagiti testimonia dagiti dua a testigo.
Iti maysa a pampubliko a dokumento iti idi kalman, kiniddaw ti depensa iti ICC Trial Chamber III ti saanda a panangakseptar iti kiddaw ti prosekusion nga awaten dagiti nagbalin a testimonia dagiti nasao a testigo a da P-1393 ken P-1416.
Nupay kasta, awan met ti nagbalin a panangbabalaw ti depensa iti pannakausar iti testimonia ti maika-tallo a testigo a ni P-1370.
Kabayatanna, segun iti depensa, ti testimonia da P-1393 ken P-1416 ket maipanggep kadagiti saan a pagkinnaawatan a banag a dakkel ti mabalin nga agbalin nga epektona iti kaso ti dati a Presidente a ni Rodrigo Duterte.
Inpettengda a masapol pay ti naigiget a panangtingiting ken ti pannakasapol a masaludsod dagiti testigo tapno masigurado ti kredbilidad dagiti nasao a testigo.
