Agtultuloy ti nasayaat ken naannayas nga operasion ti dua nga One Town One Product Hub wenno OTOP ditoy probinsia.
Segun ken ni Ilocos Norte Department of Trade and Industry (DTI) Director Amelia Galvez, agtultuloy dagiti turista nga aggatang kadagiti dua a Pasalubong Centers no sadinno a dagitoy ket nakapuesto iti Barangay Kaparispisan iti ili ti Pagudpud ken iti Laoag International Airport.
Ditoy a maitampok dagiti nagduduma a produkto manipud kadagiti nagduduma nga ili iti probinsia.
Mainaig iti daytoy, maragsakan ni Galvez ti agtultuloy a mapaspasatrek dagiti dua nga Hub a kayatna a saoen ket ado dagiti matulunganda a Micro, Small and Medium Enterprises (MSMEs) gapu ta ditoy a naggapo dagiti mailaklako iti OTOP hub.
Innayonna a babaen dagiti nasao nga hub ket dakkel ti maipaay da a suporta kadagiti nagduduma a produkto a pinataod ken inaramid dagidi nagduduma a cooperatives, assosiasion, barangay, ken dadduma pay a gunglo.
