Kalikagum ti Pilipinas ken Japan a papigsaen pay ti kooperasionda iti depensa ken seguridad iti Southeast Asia tapno masungbatan dagiti didigra, tension iti kabaybayan ken ti agbalbaliw a security dynamics iti Indo-Pacific Region.
Daytoy ti inbatad ni Philippine Defense Secretary Gilberto C. Teodoro Jr. ken ni Japanese Defense Minister Koizumi Shinhiro iti opening remarks iti “ASEAN Plus One Defense Ministers’ Indormal Meeting with Japan” nga indauloan ti Pilipinas
Segun ken ni Teodoro, napateg ti papel ti Japan kas nabayagen a kabinnulig ti ASEAN, aglalo iti panagbirok ti agtitipon a panagtignay kadagiti pannubok iti East China Sea ken dadduma pay a paset ti kabaybayan a nakaapektar iti intero a rehion.
Malaksid iti daytoy, nagyaman ti sekretaryo iti agtultuloy a suporta ti gobierno ti Japan iti ASEAN centrality ken kadagiti inisiyatibo a mangpapigsa iti kabaelan iti depensa ken maritime security dagiti kabinnulig a pagilian.
Nadakamat pay iti panagtataripnong ti agdama a kooperasion ti dua a pagilian kas dagiti co-chair ti “ASEAN Defense Ministers’ Meeting-Plus Working Group on Maritime Security” para iti tawen 2024 agingga 2027.
Inpasigurado met ti dua a pagilian a dagiti pagbinnuligan nga aktibidad ken ti “Future Leaders Program’ ket agtultuloy a mangpapigsa wenno mangpatibker iti disaster resilience, seguridad iti kabaybayan, ken ti relasion dagiti umili iti rehion.
