Ginutigot ni Presidente Ferdinand Marcos Jr. ti publiko a saan nga ag-panic kalpasan a kimmapuy manen ti piso ken umabot iti sumurok P64 ti sukatna daytoy iti maysa a dolyar.
Idi Oktubre 28, bimmaba iti P64.08 ti piso iti kababaan a gatadna daytoy iti foreign exchange. Segun ken ni Marcos, agtultuloy nga agar-aramid ti wagas ti gobierno tapno malappeddan ti agtultuloy a panagkapuy ti piso.
Kuna pay ti Presidente nga adda umdas a kabaelan ti gobierno tapno suportaran ti lokal a kuarta. Inyarigna iti panagkapuy ti piso iti panagngato ti presio ti langis iti pangsangalubungan a merkado ken iti panagpigsa ti dolyar.
Gapu iti daytoy, posible nga ad-adda a nangina dagiti produkto a maangkat manipud iti sabali a pagilian, karaman ti langis ken sumagmamano a kangrunaan a magatang. Posible pay daytoy a makaapektar iti plete ken dadduma pay a gastos dagiti umili.
Nupay kasta, inbatad ni Marcos nga agtultuloy ti panagbirok ti wagas ti gobierno tapno maipababa ti presio ti tararon.
Kabayatanna, agtultuloy a banbantayan ti garaw ti piso iti posible nga epektona daytoy iti presio dagiti magatang ken iti gastos dagiti Pilipino.
