LAOAG CITY – Naitaray iti ospital ni senador ni Chris Murphy ti Estados Unidos kalpasan a na-stroke daytoy.
Narikna ti agtawen ti 53 nga agpanpanday linteg ti panagkapuy ti takkiag na kabayatan ti panagbuyana ti hockey game ti anakna isut gapuna a naitaray a dagus iti lokal a pasilidad, ngem naiyakar iti Johns Hopkins para iti naan-anay a pannakatamingna.
Inpakaammo ti opisina na a siririing, alerto, ken nasayaat ti panagsungbat ni Murphy kabayatan ti pannakataming na isut gapuna a positibo dagiti doktor nga alisto a makarekobre ti nasao a senador.
Naamoan a sakbay ti insidente, aktibo ti panagkampanya ni Murphy iti nagduduma a paset iti pagilian kadwa na dagiti pada na a democrats para iti umadanin a midterm elections uray saan nga agpaidasig ita a tawen.
