LAOAG CITY – Binilin ti International Criminal Court (ICC) ni dati a Presidente Rodrigo Duterte ti pisikal a panagatenadarna iti amin nga aldaw ti panagusig iti sangsangoenna a kaso a crimes against humanity a naikeddeng a mangrugi intono Nobiembre 30 iti daytoy a tawen idiay The Hauge, Netherlands.
Mainaig iti daytoy, inannugotan met ti lead counsel ni Duterte a ni Peter Haynes ti pammilin ti korte, no sadinno inpasiguradona ti panagatendar ti kliyentena iti mismo a courtroom iti oras ti panagrugi ti trial.
Kabayatanna, kinumpirmaran met ni Senior Trial Lawyer ken ICC Prosecutor Julian Nicholls ti sumurok-kumurang 29 a testigo manipud iti Pilipinas ti manamnama nga agtestigo babaen ti video weno audio-visual link (AVL).
Nupay kasta, binilin ni Judge Korner a masapol nga umuna a mangngeganda dagiti testigo a personal a sumango iti korte iti uneg ti courtroom sakbay dagitoy a mapalubosan nga agtestigo babaen ti video conferencing.
Maipalagip a sumangsango ni dati a Presidente Duterte kadagiti kaso nga adda pakainaiganna kadagiti maipagarup panangpapatay ken ti panaglabsing iti paglintegan ti karbengan ti tao babaen iti nagbalin a kampanyana kontra droga.
