Pinaigetan ti Department of Agriculture (DA) ti panangtingiting kadagiti teknikal a detalye dagiti proyekto kalpasan a naitudo dagiti biddut iti impormasion ti sumagmamano a farm-to-market road (FMR), pakairamanan ti coordinates-da.
Inbilin ni Agriculture Secretary Francisco P. Tiu Laurel ti naiget a panangtingiting kadagiti detalye ti proyekto, dagiti attached documents ken proseso ti validation tapno masigurado nga umno, kompleto ken mapaneknekan dagiti imporamasion nga isumitir ti ahensia.
Daytoy ket kalpasan a nakita dagiti civil society group a People’s Budget Coalition, BetterGov.ph ken BistroProyekto ti saan a panagpada dagiti sumagmamano a coordinates dagiti farm-to-market road (FMR) a naisumitir ti Department of Agriculture iti panagdengngeg ti Senado mainaig ti gakat a budget ti ahensia para iti 2027.
Iti umuna a panangtingiting, nakita a namunganay kadagiti beddut iti panag-encode ken pagta-type dagiti pagsasabaliyan.
Nupay kasta, inbatad ti Department of Agriculture a sungbatanna ti aniaman a biddut nga impormasion manipud iti ahensia ken ikorehirda dagitoy.
Kalpasan ti panagdengngeg, iti bilin ni Tiu Laurel, nakitaripnong ni Undersecretary for Infrastructure and Agro-Marine Logistics Arrey A. Perez kada Kenneth Abante ti People’s Budget Coalition ken Dondon Parafina ti BistoProyekto.ph, karaman ni Bureau of Agriculture and Fisheries Engineering Director Cristy P. Pilido, tapno trataren dagiti naitudo a biddut.
Iti nadakamat a taripnong, naamoan a walo laeng iti pakabukalan a 1,669 a listaan, wenno awan pay maysa a posiento, ti adda saan nga agpada a coordinates. Gapu iti daytoy, saan a maitunos dagitoy iti lokasyon dagiti proyekto.
Iti naiget a panagsukimat, nakita a maysa wenno dua numero laeng ti coordinates ti biddut a nai-type.
Nupay kasta, nagtinnulag ti Deparment of Agriculture ken dagiti civil society group a mangisayangkat ti internal review, cross review ken independent review dagiti third party tapno matingtingiting ti panagsagana, panagberipikar ken panangisumitir dagiti dokumento.
Gagemna daytoy a maitudo wenno maamoan dagiti kinakurang iti proseso ken mangipatungpal ti ad-adda a naiget nga internal control. Administratibo ti panagsukimat ken nakapokus iti panangpaimbag dagiti sistema ken responsibilidad ti ahensia.
Kabayatanna, nagkiddaw ti Department of Agriculture kadagiti civil society group a mangisayangkat ti independent assssemnt iti coordinates dagiti farm-to-market (FMR) project a nairekord nga adda biddutna.
Inpetteng ni Tiu Laurel nga agtalinaed ti Kongreso ti constitutional power iti national budget kabayatan a resposibilidad ti Department of Agriculture a siguradoen nga umno ken mapaneknekan dagiti teknikal nga impormasion nga isumitir na.
