Adda ti pagsasao a nalablabon ti sumangbay a grasya no ammo ti agparabor iti pada a tao.
Daytoy ti pammati ti maysa a lalaki idiay Ohio isut gapuna a ti inabak na a $20,000 manipod iti tinayaan na a lotto ket intedna ti kagudwa na iti lola na.
Segun iti lalaki a nabigbig laeng iti nagan na nga Alan, napaneknekan na a saan a napaidam ti grasya no naparabor iti pada a tao gapu ta kalpasan nga ingudwaan na ti lola na iti inabak na a 20 ribo a dolyar ket nangabak manen ti $500 prize manipod iti sabali nga ay-ayam.
Inpakaammo ni Alan nga addan sumagmamano a tawen sipud rinugyan da iti lola na ti agtaya iti lotto ngem ita laeng a nangabak.
Inlawlawag ni Alan a ti kwarta na ket pagbayad na kadagiti kasapulan da iti uneg ti balay idinto a ti intedna iti lola na ket para kadagiti dadduma pay nga appoko na.
