Adda ti pakabuklan a 12,775 nga indibidwal ti natulungan ti Philippine Red Cross (PRC) iti intero a pagilian iti naiyuswat nga Undas Operations 2026.
Basar iti final report ti Philippine Red Cross, manipod iti nasao a bilang ket 12,180 kadakuada ti dimmalan ti vital signs monitoring, 548 ti naagasan iti minor medical cases, 32 ti narespondean iti major emergencies, ken 15 ti naikabil iti ospital.
Tapno masigurado ti alisto a panagresponde, nagiwaras ti Philippine Red Cross ti 2,357 staff ken volunteers, a sinuportaan ti 432 first aid stations, 159 welfare desks, 159 Volunteers for Emergency Response and Vehicles (VERV), 80 nga ambulansya, 80 nga scooters, 79 foot patrol units, ken dadduma pay a kagamitan.
Dinayaw ni PRC Chairman ken CEO Richard Gordon ti sakripisyo dagiti volunteer nga inbati da ti bukod da a pamilya tapno agbantay kadagiti kamposanto, kalsada ken terminal.
