LAOAG CITY – Inbatad ti Philippine Chamber of Agriculture and Food, Inc. (PCAFI) a mabalin a maapektaran ti panagkapsot ti piso ti rice importation ti pagilian.
Immunan iti daytoy, kinuna ti Department of Agriculture (DA) a ti pakabukelan a rice imports ti pagilian ket manamnama nga umabot wenno sumurok iti 5 million a metriko tonelada (MT) iti daytoy a tawen. Daytoy ket tapno mabalanse ti posible a panagkurang ti local production.
Mainaig iti daytoy, iti agdama, addan ti 4.8 million a metriko tonelada ti na-import ti pagilian, no sadinno mabalin a sumurok pay iti 5 million manipud iti immunan a target a kasapulan ti pagilian gapu iti manamnama a pannakalugi ti pagay gapu pay laeng iti nagbalin nga epekto ti Habagat ken ti manamnama nga epekto ti El Niño iti daytoy a tawen.
Kabayatanna, gapu iti agtultuloy a panagkapsot ti piso, manamnama nga apektaranna ti buying power ti pagilian a manggatang kadagiti sumagamamano a produkto kas ti rice ken ti fertilizer.
