LAOAG CITY – Balligi ti tallo nga aldaw a pannakaisayangkat ti kaunaan a Dulang Festival iti lokal a gobierno iti siudad ti Laoag.
Segun ken ni Mrs. Mary Jane Leaño, mangidadaulo iti City Tourism Office ditoy siudad nga agbalinen a paset ti nabaknang a kultura dagiti Laoageño ti Dulang Festival ken maysan nga ordinansa iti siudad ti Laoag.
Kinunana a ti Dulang Festival ti mangipakita ti kinabaknang ti tradision ken wagas ti pannangan, taraon, kultura ken kababalin dagiti Ilokano.
Iti uma nga aldaw ti pannakiwayat ti Dulang ket naisayangkat ti motorcade a nakipagpartisiparan dagiti nagduduma a food establishments ditoy siudad ken ti Dulang Barangay iti aglawlaw ti Laoag City Hall a nakipasetan ti Liga ng mga Barangay, dagiti opisiales ti siudad ken dagiti umili a nakipagpaset iti boodle fight.
Naitampok iti selebrasion dagiti naisangsangayan a luto ken taraon dagiti ilokano kas ti sarabasab, dinakdakan, lusay ken dagiti dadduma pay a paborito a taraon dagiti ilokano.
Iti maika-dua nga aldaw ket naituloy ti selebrasion babaen ti Dulang ni Ilkoano iti Laoag City public market and Commercial Complex.
Babaen ti Tema a taraon iti tiendaan, naipakita ti kinabaknang ti lutong Ilokano kas ti dinardaraan, lusay ken dagiti dadduma pay a napateg a paset iti tradisional a pannangan iti biag ken kultura dagiti umili.
Iti tallo nga aldaw ket ditoy met a naisayangkat ti kaunaan a Dulang Festival Cook Fest a nabingay ti kopetision iti tallo a kategorya iti Elementarya a nagluto ti lusay noodles, Sekondarya a nagluto ti Hi-bol ken dagiti kolehiyo a nangipakita ti bartending babaen ti panangipangruna ti basi.
