Nagtalinaed ti ₱320 ti kada kilo ti presio ti karne ti baboy iti merkado publiko ditoy siudad ti Laoag.
Segun ken ni Mr. Ramel Dela Cruz, Presidente ti Meat Vendors iti Laoag City Public Market, ti posible a panagbaba ti presio ti karne ti baboy sakbay a malpas ti tawen ket basar ti pammilin ti Department of Agriculture (DA) kageddan ti panagngato ti imported a mais.
Inlawlawag ni Dela Cruz a masapul a kitaen ti law of supply and demand tapno maawatan ti panagbaliw ti presio ti karne.
Innayonna a sumursurot dagiti aglaklako iti karne iti ordinansa nga Executive Order No. 017, Series of 2026, a pinirmaan ni Laoag City Mayor James Bryan Q. Alcid a nangikeddeng ti tunggal aldaw ti Biernes kas naisangsangayan nga aldaw para iti panagparti kadagiti baboy a naggapu kadagiti lokal a hog raisers iti siudad.
Malaksid iti daytoy, adda met iti ordinansa mainaig iti liveweight no sadinno adda iti rekomendasion a presio ti panaggatang kadagiti baboy depende iti kinadagsen wenno timbang.
