LAOAG CITY – Inlungalong ni Senate Committee on Social Justice, Welfare, and Rural Development. Chairperson Sen. Erwin Tulfo ti rakurak a linteg a mangipaay ti kanayunan a proteksion para kadagiti mangmangged a posible a maawaan ti pagbiagan gapu iti panagusar dagiti sumagmamano a kumpanya ti artificial Intelligence (AI) ken ti automated systems dagiti kumpanya.
Iti salinong ti Senate Bill No. 2563, kalikagum ni Tulfo a mabalbaliwan ti Article 298 ti Labor Code of the Philippines tapno maprotehiran dagiti empleado a mabalin a maikkat iti kumpanya gapu iti AI-driven automation.
Segun ken ni Tulfo, no man pay saan a maliklikan ti panagdur-as ti teknolohia, saan koma a dagiti mangmangged ti agsagrap iti epektona daytoy.
Kabayatanna, iti salinong ti nasao a rakurak, mabalin laeng nga ikkaten wenno ikkatan ti trabaho ti maysa nga empleado nga agusar ti AI no mapaneknekan a pudno ke napintas ti rasonna iti panagusarna iti nasao a teknolohia. Malaksid iti daytoy, masapol pay nga addaan ti naan-anay a rason ti maysa a kumpanya kas ti panagin-inot iti gastos ken no awanen ti sabali pay a mabalin nga aramiden no diketdi ti panagusar ti AI a mangitunda iti pannakaikkat ti maysa nga empleado iti trabaho.
