LAOAG CITY – Natay ti sumurok 40 a pilot whales kalpasan ti pannaka-stranded-da iti igid ti baybay idiay New Zealand idi laeng Huebes.
Basar iti Department of Conservation (DOC) ti nasao a pagilian, nakita dagiti balyena iti Ngawi coast asideg iti Cape Palliser idiay North Island, New Zealand.
Iti inisial a report ti Project Jonah New Zealand, maysa nga environmental organization, sumurok 20 a balyena ti immuna a na-stranded iti nasao a baybay.
Gapu iti daytoy, manarimaanen ti pannakikoordinarda kadagiti nagduduma nga ahensia ti gobierno ti New Zealand, pakairamanan ti lokal a tribu ti Māori mainig iti nasao a pannaka-stranded dagiti balyena.
Nupay kasta, manipud iti immuna a 20 a balyena, nakita menen ti Department of Conservation (DOC) idi laeng Biernes ti 43 a natay a balyena iti kabaybayan ti Ngawi agingga iti paset ti Mangatoetoe.
Kabayatanna, kinuna ti Department of Conservation (DOC) ti nasao a pagilian a masansan ti pannaka-stranded iti nasao a baybay dagiti balyena ngem saanda pay a mabigbig ti rason ti masansan a pannaka-stranded-da iti nasao a lugar.
