Inlawlawag ti warden ti New Quezon City Jail a saan a 24 nga oras nga agtalinaed ti personal assistant ni dati nga House Speaker Martin Romualdez iti uneg ti pagbaludan.
Daytoy a rakurak ket kontra iti umuna a rakurak iti Sandiganbayan.
Iti panagdengngeg ti Sandiganbayan Third Division idi Nobiembre 9, inbatad ni Jail Superintendent Maria Lourdes Pacion a mapalubusan laeng a makastrek ni Arvin de Guzman, personal aide ni Romualdez iti regular a visiting hours manipud ti oras ti alas-8 ti bigat agingga alas-5 ti malem.
Inlawlawag ni Pacion a karaman ni De Guzman iti opisial a listaan dagiti bisita ti pasilidad ken agtalinaed a naka-on-call daytoy iti aniaman nga oras tapno sungbatan dagiti kasapulan ni Romualdez.
Mainaig iti daytoy, dimmawat ti pammakawan ni Pacion iti Sandiganbayan kalpasan daytoy nga inlawlawagna ti immuna a testimoniana a palpalubusan ti aide nga agtalinaed iti abay ni dati nga Speaker iti 24 nga oras.
Nupay kasta, kinumpirmaran ti abogado ni Romualdez a ni Judd Roy a inkiddaw ti legal team-da iti Bureau of Jail Management and Penology (BJMP) a palubusan a tumulong ni De Guzman ken ti dati nga Speaker gapu ta nabayag daytoy nga agtrabtrabaho ken pamiliar kadagiti agas ken dadduma pay a kasapulan a pangmedikal ni Romualdez.
Naisayangkat ti panagdengngeg ti Sandiganbayan tapno siguradoen ti kasasaad ken kustodiar ni Romualdez kalpasan ti alegasion a makaruruar daytoy ti pagbaludan usar ti ambulansia.
Inbabawi payen ti kolumnista a ni Ramon Tulfo ti nadakamat nga alegasion kalpasan nga inadmitirna a biddut ti impormasion ti naawatna.
Immunan nga inbilin ti Sandiganbayan ti Bureau of Jail Management and Penology (BJMP) nga agsumitir ti detalyado a report, pakairamanan ti CCTV recordings, listaan dagiti bisita ken panaggaraw dagiti behikulo iti pasilidad.
Maipalagip a sumangsango ni Romualdez ken tallo pay iti kaso a plunder mainaig iti maipagarup a P7.4 billion a kickback scheme kadagiti flood control project. Naglikudan met ni Romualdez ti pannakairaman iti daytoy ken nangipila ti not guilty plea iti kaso.
