Marigatan ti Philippine National Police (PNP) a mangestablisar ti paglemlemmengan ni Senador Ronald “Bato” dela Rosa iti baet ti nasurok a 500 nga impormasyon a naawat dagiti otoridad maipanggep iti possible a lokasyon na.
Segun ken ni PNP chief Gen. Jose Melencio Nartatez Jr., nangiwayaten ti operasyon dagiti pulis iti nagduduma a paset ti pagilian tapno iberipikar dagiti naawat da nga impormasyon.
Karaman kadagiti lugar a nagturungan dagiti otoridad ket iti Western ken Eastern Mindanao, Visayas, Bicol, Southern Tagalog, kasta met ti Northern ken Central Luzon.
Kuna ni Nartatez nga uray kadagiti nasusulimek a lugar ken isla ket sinawar dagiti otoridad ngem saan da a nakita ti senador.
Agtultuloy ti panangbiruk dagiti otoridad ken ni Dela Rosa tapno maiserbi ti arrest warrant nga inparuk-at ti International Criminal Court (ICC) mainaig iti kaso na a crime against humanity of murder nga adda ti pakainaigan ti nadara a kampanya kontra ilegal a droga idi panawen ti administrasyon ni dati a Presidente Rodrigo Duterte.
