LAOAG CITY – Naapektaran dagiti operasion ti transportasion ken sumagmamano a serbisio ti gobierno idiay Spain gapu iti naiwayat a tignay protesta.
Daytoy ti maibilang a kaunaan a general strikes iti pagilian iti uneg ti 14 a tawen.
Iyik-ikkis dagiti demonstrador ti problema iti pabahay ken ti nangato a presio dagiti magatang iti nasao a pagilian.
Naiyuswat ti tignay protesta sumagmamano nga aldaw sakbay ti parliamentary elections a maiwayat intono Nobiembre 29 ita a tawen.
Mainaig iti daytoy, inbatad ti Spanish Confederation of Business Organisations nga awan ti nagbalin a dakkel nga epekto ti nasao a tignay protesta gapu ta kalpasan iti nasao nga aktibidad ket naituloy metlaeng a dagus ti operasion dagiti pasdek negosio iti nasao a lugar.
Kabayatanna, inarestar dagiti otoridad ti sumagmamano nga indibidual a nakipaset iti tignay protesta partikular dagiti nanggandat a mangserrek kadagiti opisina ti gobierno.
