Nagpanawagan ni Ombudsman Jesus Crispin “Boying” Remulla a marepaso ken mapaigetan dagiti kwalipikasyon dagiti kandidato a para barangay captain tapno masigurado ti kabaelan ken pagsungsungbatan iti panangidaulo da.
Iti panagbitla na iti 2026 Career Executive Service Lifelong Learning for Leadership Congress iti Manila Hotel, inpetteng ni Remulla ti kinapateg ti nangatngato a kwalipikasyon para kadagiti opisyal ti barangay.
Basar iti Section 39 ti Local Government Code, mabalin nga agpaidasig a para barangay chairman ti maysa a Pilipino a saan a nababbaba iti 18 ti tawen na, rehistrado a botante, residente ti barangay a saan a nababbaba ngem maysa a tawen ken ammo na ti agbasa ken agsurat.
Segun ken ni Remulla, masapol nga adalen no rumbeng dagiti nasao a kwalipikasyon, aglalo ket dagiti barangay captain ti akin-responsibilidad iti panangiwanwan ti pondo ti umili, mangiptungpal kadagiti programa ti gobierno, ken mangipaay kadagiti kasapulan dagiti masakupan.
Inpaganetget na a no naiget ti kwalipikasyon iti panagpili kadagiti career government official, rebbeng laeng a maaddaan ti maiyannatop a kwalipikasyon para kadagiti mangidaulo iti kabassitan nga unit ti gobierno.
Nupay kasta, inlawlawag ti Ombudsman a saanna a tagbassiten ti kabaelan dagiti agdama a barangay captain, gapu ta ado kadakuada ti napudno ken nasirib iti trabaho da.
