LAOAG CITY – Binigbig ti Guinness World Records ti maysa a Japanese musician a naawanan ti akinkannawan nga ima kalpasan a nasursuroanna manen a patukaren ti violin-na usar ti prosthetic arm-na.
Ni Manami Ito, agtawen 42 ket tampok iti Guinness World Records 2027 kas makin-iggem iti titulo a “first violinist with a full prosthetic arm.”
Naalana ti record kalpasan ti panagperform-na iti maysa a medical conference idiay Kobe, Hyogo. Japan idi Agosto 5, 2012.
Ubing pay laeng ni Manami ket panggepnan nga agtukar usar ti violin ngem nagsabali ti turong ti biagna kalpasan daytoy a naaksidente idi 2004 ket gaputa ti akinkannawan nga ima ti naikkat kenkuana nga iso ti masansan nga ususarenna, nawanan daytoy ti namnama a makatukar pay ti violin.
Nupay kasta, pinadasna nga iyadaptar ti bagina iti baro nga imana, no sadinno nasursuranna manen a patukaren ti instrumentona.
Malaksid iti panagtukarna iti violin, inbagianna pay ti pagilianna iti isports a swimming iti Beijing 2008 ken London 2012 iti Paralympic Games.
Kabayatanna, idi 2019, nag-perform pay daytoy iti American talent competition a The World’s Best, no sadinno, dinayaw dagiti celebrity judges ti nagbalin a performance-na.
