LAOAG CITY – Manamnama nga agbalin a dakkel a tulong kadagiti mannalon ti Talabutab Norte Primary Multipurpose Cooperative ti panangipaay kadakuada ti moderno a Rice Processing System II (RPS II).
Basar iti report, agarup 11,000 a mannalon manipud iti nasao a lugar ken ti kabangibangna nga ili ti manamnama a mabenepisiaran iti daytoy a proyekto para iti pannakaipapintas ken pannakaipaalisto ti proseso dagiti apitda.
Mainaig iti daytoy, babaen iti daytoy a pasilidad, manamnama a makissayan ti P2 agingga P3 iti kada kilo ti gastos iti produksion.
Malaksid iti daytoy, dakkel pay ti agbalin a kontribusionna daytoy iti panangipababa ti mabalin a mapasaran a pannakalugi kalpasan ti panag-apit dagiti mannalon.
