LAOAG CITY – Inpublikar ti AXA Mind Health Report 2026 a 31% kadagiti Pilipino ti makapaspasar ti pannakaliday ken 74% met ti nangibaga a saan a napintas ti agbalbalin nga epekto ti screen time iti panagturogda.
Gapu iti daytoy, kinuna ti National Center for Mental Health (NCMH) a masapol a kitaen ken maikkan ti importansia ti inaldaw a kadaywan dagiti Pilipino a kinunana a mabalin a makaapektar ti napaot nga interaksion iti online iti mental health ti maysa a tao a mangitunda ti problema iti panagturog.
Mainaig iti daytoy, iti nasao a report, masapol a maikkan ti naan-anay nga oras ti panagturog ken ti panagriing iti umno nga oras gaputa ditoy a makainana ti utek ken bagi a kasapulan iti inaldaw nga aktibidad ti maysa a tao.
Kabayatanna, nadakamat pay ditoy a makatulong ti panangliklik iti panagusar ti gadgets sakbay a maturog tapno makissayan ti lapped iti panagturog ken makainana a nasayaat.
