palay price
palay price

Ginutigot ti Department of Agriculture – Philippine Rice Reseach Institute (DA-PhilRice) dagiti Pilipino nga agbalin nga aktibo iti panangpapigsa ti industriya ti bagas iti pagilian iti panagselebrar ti National Rice Awareness Month iti Rizal Park, Manila.

Segun ken ni DA-PhilRice Los Baños Director Rhemilyn Z. Relado-Sevilla, ti seguridad iti taraon ket saan laeng nakadependar iti kinaado ti apit dagiti mannalon no di ket ti responsable a panagkonsumo dagiti konsumer.

Inpaganetget na a dakkel ti maitulong ti panagliklik iti panagsayang iti innapoy, panaggatang ti lokal a bagas ken panagpili ti nasustansia a klase iti daytoy tapno mapagtalinaed nga umdas ti suplay iti pagilian

Naipaiyamammo pay iti programa dagiti alternatibo a nasustansia bagas, kas ti brown, black, red, low-glycemic ken high-zinc rice, iti panangidaulo ni Officer-in-Charge (OIC) Deputy Executive Director Henry Corpuz tapno masungbatan dagiti isyu ti nutrision.

Tampok iti maika-24 a Ceremonial Rice Harvesting ti 300-square-meter Rice Garden no sadinno nakapasar dagiti estudiante ken residente iti siudad ti manual a panagapit kadua dagiti nagduduma a kabinnulig nga ahensia.

Innayon pay ti ahensia a ti panagdur-as ken panagsigurado iti taraon ket saan laeng a responsibilidad dagiti mannalon no di ket nakadependar pay iti nalaing a panagusar ti tunggal konsumer iti tunggal pidaso ti bagas.