LAOAG CITY – Nakairekord ti Pilipinas ti nangatngato a cash remittances manipud kadagiti overseas Filipino workers (OFW) iti bolan ti Setiembre iti daytoy a tawen kumparar iti kapada a bolan idi napalabas a tawen.

Basar iti report nga inparuk-at ti Bangko Sentral ng Pilipinas, umabot iti $3.20 billion wenno P20.4 billion ti inpaw-it a kuarta dagiti OFW idi laeng Setiembre, no sadinno nangatngato daytoy kumparar iti nairekord a $3.12 billion wenno P19.9 billion idi Setiembre 2025.

Indauloan ti Estados Unidos iti naggapoan dagiti nasao a patulod nga umabot iti 39.8% ti pakabukelan a bilang dagiti patulod a kuarta.

Sinaruno daytoy ti Singapore a nakairekord ti 7.1% ken idinto a 6.4% met ti Saudi Arabia.

Segun iti ahensia, ti agtultuloy a panangngato ti bilang dagiti cash remittances ket dakkel a tulong para iti inaldaw a gastos dagiti pamilya a Pilipino ken para iti pannakaipapigsa ti domestic economic activity.

Innayon pay ti ahensia a pammaneknek daytoy iti dakkel a kontribusion dagiti OFW para iti pannakaipapintas ti ekonomiya ditoy pagilian.