Inbatad ti National Food Authority (NFA) a nagtalinaed nga agingga iti ₱30 ti presyo ti kada kilo ti irik a gatgatangen da kadagiti mannalon ditoy Ilocos Norte ken Ilocos Sur.
Segun iti ahensya, agtalinaed daytoy a presyo ti irik ita a lawas, ngem inlawlawag na nga agdepende daytoy iti kalidad ti irik nga ilako dagiti mannalon.
Inrakurak ti ahensya a dagiti irik a nadalus ken namaga, nga addaan iti 11 agingga iti 14 a porsiento a moisture content, ket gatangen ti NFA iti ₱30 ti kada kilo iti Ilocos Norte ken Ilocos Sur.
Para met kadagiti saan a nadalusan ken saan pay a namagaan ket mabalin da a gatangen ti P25-27 a pisos iti kada kilo.
Segun iti ahensya, dagitoy a presio ket naibasar iti kaudian a naaprobaran nga Equivalent Net Weight Factor (ENWF).
Gagem ti NFA – Ilocos Norte Branch Office a makagatang iti agarup 375,000 a sako ti irik.
Iti kaudian a report, agarup 58,000 a sako ti nagatang laeng ti ahensia iti napalabas a bolan.
Gapu iti daytoy, ginutigot ti ahensya dagiti mannalon nga ilako da ti apit da kadagiti buying stations ti NFA iti Ilocos Norte.
Inpakaammo ti ahensya a dagiti buying stations ti NFA ditoy Ilocos Norte ket ti Dingras GID Warehouse a masarakan iti Barangay Saludares, ken ti Laoag GID Warehouse a masarakan iti Sta. Joaquina ditoy siudad ti Laoag.












