LAOAG CITY – Naidumduma manen a talento ken kinalaing iti panagakem ti inpakita ti aktres a ni Andrea Brillantes iti sangalubongan nga entablado.

Daytoy ket kalpasan a nabigbig kas Best Acting Performance para iti baro a pelikula na a “Laya” iti Women and the World International Film Festival (WWIFF) a naisayangkat idiay London.

Saan laeng a basta maysa nga award ti naawat ni Andrea no di ket naitampok pay iti nasao nga international film festival dagiti pelikula a mangipapaay boses kadagiti babbai, talento, kinatibker, ken abilidad da a mangidaulo kadagiti nagduduma a fields kas iti pelikula, kultura, ken dadduma pay a pakasaritaan iti komunidad.

Mainaig iti daytoy, maragsakan ni Andrea gapu ta daytoy ti kaunaan a gundaway a nagakem kas lead star iti maysa a pelikula.

Ti pelikula ket inderehe ni Sigrid P. Bernardo babaen iti produksion ti Rein Entertainment, no sadinno a makadwa ni Andrea ditoy da JC Santos ken Anthony Jennings.

Nnakaawat pay ti pondo ti pelikula manipod iti Film Development Council of the Philippines (FDCP) babaen ti CreatePH Large Budget Production Grant.