LAOAG CITY – Manamnama ti pannakaimplementar ti pannakaipangato ti plete kadagiti tricycle ken kalesa ditoy siudad ti Laoag iti kabiitan a panawen.
Daytoy ket kalpasan a naideklarar kas valid babaen ti Sangguniang Panlalawigan ti ordinansa nga inisponsoran ni Konsehal Jaybee Baquiran a maipangato ti plete kadagiti tricycle ken kalesa.
Gapu iti daytoy, agbalin ton a P25 ti regular fare manipod iti P20 a plete.
Mainaig iti daytoy, nagkiddaw ni Vice Mayor Rey Carlos Fariñas ti pannakikoordinar ti Sangguniang Panlungsod iti FETAL President wenno ti gunglo dagiti tricyle tapno ipakaammo ti pannakaipangato ti plete.
Inlawlawag ni Fariñas a kasapolan nga ipakaammo daytoy kadagiti tricycle drivers and operators tapno maisagana da dagiti kasapolan da a bayadan kagiddan ti pannakaimplementar ti panagngato ti plete.
Innayon na a kasapolan a maiplastar ti mapping ti plete wenno ti fare guide matrix kas immunan a kiniddaw iti Chairman ti Committee on Transportation a ni Sangguniang Panlungsod Member Jaybee Baquiran tapno ammo dagiti aglugan ti rumbeng a pagplete da.












