Nagdeklarar ti alarma ti krisis dagiti estado ti Fiji ken Tonga iti South Pacific mainaig iti nakaro a tikag a mapaspasaran da gapu iti El Niño phenomenon.

Segun iti gobierno ti Fiji, ti agtultuloy a panagpasar ti El Niño iti rehion ket umaboten iti “crisis threshold”, isut gapuna a naideklarar ti nationwide disaster.

Basar kadagiti lokal a report, bimmaba iti makaalarma a lebel ti suplay ti danum iti pagilian no sadino dinosdosena a truck ti ipatpatulod dagiti otoridad tapno makaipaay ti suplay kadagiti kangrunaan a naapektaran ti tikag.

Kabayatanna, nakairekord met iti Tonga ti nadakamat a krisis no sadinno a naideklarar ti 27 nga aldaw nga state of emergency gapu iti kinakurang ti suplay ti danum gapu iti nakaro a tikag.

Segun ken ni Acting Prime Minister Viliami Latu, makatulong ti pannakaideklarar kadagiti emergency services gapu ta al-alisto a maipaay iti kasapulan nga adda ti pannakainaig iti nadakamat a krisis.