Possible nga umatiddog ti proseso ti panagala ti green card dagiti Filipino nurse ken physical therapist iti Estados Unidos iti babaen ti nailungalong a panagbalbaliw dagiti pagannurutan iti panagala kadagiti gangannaet a mangmangged.

Basar iti lungalong nga inparuk-at ti US Department of Labor, kalikagom da nga ikkaten ti maaw-awagan ti Schedule A exemption iti Permanent Labor Certification Program wenno PERM, a mangipalubos kadagiti employer a mangala ti foreign nurses ken physical therapists a saanen a dumalan iti naipagagangay a labor recruitment process.

No maaprubaran daytoy ket kasapulan paylaeng a paneknekan dagiti employer a nangiyuswat da ti umdas a recruitment tapno maikkan ti gundaway dagiti kuwalipikado a mangmangged nga Amerikano sakbay nga agala kadagiti gangannaet.

Karaman ditoy ti nalawlawa a panangirakurak kadagiti bakante a trabaho ken panagi-dokumento ti recruitment efforts sakbay a makaala ti labor certification ken makaipila ti immigrant petition.

Gapu iti daytoy, possible nga ad-adda pay nga agpaot ken ad-ado ti magastos iti proseso ti panagala ti green card para kadagiti Pilipino nga agkalikagom a mapan agtrabaho ken permanente nga agnaed idiay Amerika.