LAOAG CITY – Nakasagana ni Atty. Salvador Paolo A. Panelo, Jr. a sangoen ti Show Cause Order nga inparuk-at ti Senate Impeachment Court.

Inbatad ni Panelo a patas dagiti dinakamatna ken saan dagitoy a makaapektar iti panangipatungpal ti linteg.

Ti Show Cause Order ket maysa a pormal a balaag manipud iti korte wenno tribunal a mangkidkiddaw iti maysa nga indibidual ti palawagna no apay a saan daytoy a maipilaan ti pannusa para iti maysa a partikular nga aksion kas ti contempt.

Mainaig iti daytoy, sinaggaysa ni Panelo dagiti nagbalin a desision ti Korte Suprema a nangipetteng ti importansia ti kinawaya nga agsao.

Basar iti kaso ti Garcia, Jr. v. Manrique (G.R. No. 186592, October 10, 2012), linaon daytoy ti posision a “The power to punish for contempt does not… render the courts impenetrable to public scrutiny nor does it place them beyond the scope of legitimate criticism. Every citizen has the right to comment upon and criticize the actuations of public officers and such right is not diminished by the fact that the criticism is aimed at judicial authority.”

Innayonna pay ti kaso ni Tolentino v. Heydarian (G.R. Nos. E-01742 & E-01747, April 8, 2026) a nangiyun-unay ti nawaya a panagsao.

Mainaig kadagitoy, dagiti nasao a kaso ket nangpatibker iti posision ni Panelo a dagiti nagbalin a komentona ket sakupen ti konstitusional a proteksion.

Kabayatanna, inpakaammo ni Panelo a nakasaga daytoy nga agsungbat iti Show Cause Order iti uneg ti maited a pawayway kenkuana.