Inbatad ni Senate Finance Committee Chairperson JV Ejercito a karaman kadagiti kangrunaan a probision ti Senate Committee Report iti national budget ti kanayonan a pondo para iti salun-at, edukasion ken dagiti proyekto a pang-imprastraktura.
Nakapalaon ditoy ti P52 billion a nayon iti pondo para iti health sector, pakairaman ti P19.8 billion increase iti PhilHealth budget manipud P74.4 billion a nagbalin a P94.2 billion tapno mapalawa ti health coverage ken dagiti benepisio maiyataday iti Universal Health Care.
Malaksid iti daytoy, adda pay kanayonan a P9.6 billion para iti Department of Health, para iti health facilities, preventive health programs, immunization ken Sulu transition subsidy. Karaman pay dagiti prioridad ti Zero Balance Billing tapno direkta nga ipaima kadagiti ospital ti tulong medical para iti indigent patients, persons with disability (PWDs) ken senior citizens.
Nupay kasta,nangilatang pay ti 15.3 billion a nayon iti pondo para iti edukasion, pakairamanan ti P11 billion para iti school-based feeding program, nayon a pondo para iti state universities and colleges (SUCs), ken P850 million para iti SUC Smart Campus program.
Kabayatanna, insubli t P16.797 billion iti imprastraktura para iti foreign-assisted projects, pakairamanan ti Metro Manila Subway, North-South Commuter Railway, Cavite-Bataan Bridge ken Laguna Lakeshore Highway.












