LAOAG CITY – Bigbigen ti gobierno lokal ditoy siudad ti Laoag ti kinapateg ti bagas gapu ta daytoy ti kangrunaan a taraon ken produkto nga agrikultura dagiti Pilipino.
Inbatad ni Mayor James Bryan Alcid ditoy siudad ti Laoag a bigbigen daytoy ti gobierno babaen ti Presidential Proclamation 524 no sadinno a maselselebrar ti National Rice Awareness Month iti bolan ti Nobiembre, a nangrugi pay laeng idi tawen 2004.
Inpakaammo na nga adda ti tallo a banag a maipaadal iti daytoy pakairamanan ti saan a panagsayang ti bagas, gatangen ti bukod a produkto a bagas, ken imula dagiti napintas a variety.
Kunana a saan a baybay-an ti gobierno siudad ti produksion ti bagas gapu ta kasapulan ti naan-anay a suplay.
Kunana pay nga agbinbinnulig ti gobierno siudad ken dagiti organisasion dagiti mannalon iti pannakaipasigurado ti agtultuloy a produksion ti bagas.
Naruay met dagiti maipapaay nga agricultural inputs kadagiti mannalon ditoy siudad kas ti high varieties ti bagas, pannakaited ti abono, pestisidio, makina a mangpataud ti danum ken nagduduma pay a kasapulan dagiti mannalon.
Dinakamat na pay a dakkel a tulong ti pannakaaprobar ti 2027 budget ti city government gapu ta ti agrikultura ti maysa kadagiti kangrunaan a naiyalokaran iti pondo.
Inbatad ni Mayor Alcid a kabayatan ti mapaspasaran ti Super El Niño wenno nakaro a tikag ket manamnama dagiti naruay a tulong a maipaay kadagiti mannalon tapno umadu ti produksion ti agrikultura.
Kabayatanna, agtultuloy ti panangipaay da ti suporta iti agrikultura gapu ta daytoy ti ibilang da a duri ti ekonomia ken pagsapulan dagiti residente ditoy siudad ti Laoag.












