LAOAG CITY – Inpasigurado dagiti pork producers kadagiti consumers nga adda ti umdas a suplay ti karne ti baboy para iti mapaspasangasangan nga holiday season, a possible nga umabot iti nasurok a 600,000 a metriko tonelada ti  agingga intono Enero 2027.

Segun ken ni Eric Harina, Presidente ti Pork Producers Federation of the Philippines Inc., ti pakabuklan a supply ti karne ti baboy para iti 2026 ditoy pagilian ket mapatta-patta a 2.3 million a metriko tonelada, a daytoy ket nagtipon ti local production ken dagiti naangkat.

Patta-pattaen ni Harina a ti supply ti karne ti baboy ket maartapan na ti tinawen a makonkonsumo nga umabot iti  1.7 million a metriko tonelada.

Inlawlawag pay ni Harina a ti 600 a ribo a metriko tonelada a karne ti baboy ket kaibatugan ti uppat a bolan a supply iti pagilian.

Kabayatanna, nagpanawagan ti grupo para iti naig-iget ken nais-istrikto a pannakainspeksyon dagiti imported a karne ken ti ports of entry tapno ma-detect a dagus ti possible a kontaminasyon ken antibiotic residues ti African swine fever (ASF).

Innayon na nga uray dagiti imported a frozen pork ket masapol a mainspeksyon ken ma-test sakbay a maiwaras iti nagduduma a probinsya, idinto a dagiti sellers ket rumbeng nga ikkan da ti  expiration date na dagiti produkto da aglalo dagiti produkto a mailaklako iti online tapno maprotehiran dagiti consumers.