LAOAG CITY – Umaboten iti lima nga indibidual ti pimmusay gapu iti sakit a dengue ditoy probinsya.

Daytoy ket maibasar iti datos ti Provincial Epidemiology and Surveillance Unit (PESU) iti kapitolyo probinsyal.

Naamoan a dagiti pimmusay ket manipod iti ili ti Solsona, Pinili, Nueva Era, Badoc ken iti ili ti Bangui.

Iti agdama, addan ti pakabuklan a 3,140 a kaso ti dengue ti nairekord ditoy probinsia manipud Morbidity Week 1 agingga Week 45.

Gapu iti daytoy, naibalakad iti agtultuloy a panangipatungpal kadagiti usto a wagas tapno malapdan ti panagadu dagiti kaso.

Karaman ditoy ti panangikkat dagiti pagyanan ti danum a pagitlogan dagiti lamok, taktaken ken dalusan dagiti banag a mabalin a pagurnongan ti danum, siguraduen a namaga ken nadalos ti aglawlaw tapno saan a pagyanan dagiti lamok ken no adda adda sintomas ti dengue kas iti agnanayon a gurigor, nakaro a sakit ti ulo, wenno panagbakwar, mapan a dagus iti kaasitgan nga health facility.

Nagpalagip ti Provincial Epidemiology and Surveillance Unit a ti pannakasalaknib kontra dengue ket responsibilidad ti tunggal maysa.