LAOAG CITY – Ad-adda pay a paigetan ti police visibility kadagiti lugar ditoy siudad ti Laoag a mabalin a pakaiwayatan kadagiti drag racing.
Daytoy ket iti baet pay laeng iti napasamak a drag racing iti Barangay Balacad ditoy siudad ti Laoag a nakatayan ti dua a menor de edad.
Segun ken ni Mayor James Bryan Alcid, naiget ti panagpatrolya dagiti kameng ti Philippine National Police ngem ti problema ket apaman a makitada nga awandanton dagitoy ket ditoy a mangiwayatdan ti drag racing.
Inlawlawagna a no bilang adda dagiti makitada a mangiwaywayat ti drag racing ket saanda nga agpangadua nga i-report iti kapulisan.
Innayona a babaen iti pangi-report kadagiti otoridad ket maliklikan ti aniaman a mapasamak kadagiti mangiwayat kadagitoy kangrunaanna pay dagiti mairamraman.
Maipalagip a pimmusay ti dua a menor de edad kalpasan iti maipagarup a panaglulumbada ti motorsiklo.
