LAOAG CITY – Ad-adalen ti Armed Forces of the Philippines ti panaggatang iti ad-adu pay a barko a mausar iti panagpatrolia iti West Phil Sea.
Gapu iti daytoy, naan-anay ti pannakatarimaan ken pannakapalawa dagiti sangladan, base militar ken military port ti pagilian.
Segun iti hepe ti Armed Forces of the Philippines a ni Gen. Romeo Brawner Jr., narigat ti gumatang kadagiti barko no awan dagiti maitutop a sangladan a pagikabilan kadagitoy.
Kinunana a kasapulan a mapadur-as dagiti military wenno naval bases ti Armed Forces of the Philippines gapu ta agserbi dagitoy a support system para kadagiti barko ti pagilian a magatang.
Segun iti hepe, mabalin nga usaren dagitoy a barko a pangpatrolia kadagiti maritime features iti West Phil. Sea ken mentenaren ti presensia ti Pilipinas iti nasao a kabaybayan.
Sumagmamano kadagiti dadakkel a barko ti pagilian ket ti BRP Jose Rizal a naipaima idi Mayo 2020 ken ti BRP Antonio Luna a naipaay met idi Marso 21, 2021.
Iti babaen ti Armed Forces of the Philippines modernization program, plano ti Pilipinas ti gumatang kadagiti advanced ships para iti Philippine Navy ken ad-adu pay a multi-role fighter jets para iti Philippine Air Force.
