LAOAG CITY – Nagtalidtid ti nagluganan a pick-up truck ti Ilocos Norte First District Engineer a ni Engr. Albert Martin, agtawen ti 41 ken residente ti Barangay Tangid ditoy siudad ti Laoag.
Basar iti Bangui Municipal Police Station, kabayatan a dumaldalyasat ti pick-up truck nga agturong nga agpa-amianan ket kellaat a napukawan ti kontrol ti manibela ti District Engineer.
Pinadas nga agpreno ti District Engineer ngem aksidente a naidungpar iti concrete pedestal nga addaan ti solar-powered streetlight a nangitunda ti panagtalidtid ti lugan.
Gapu iti daytoy, naipupuk ti driver iti uneg ti lugan rason nga insigida a nangiwayat ti rescue and recovery operation dagiti otoridad ken nagpaut ti agarup 15 a minuto sakbay a naan-anay a nakaruar.
Nagsagaba ti sugat iti sumagmamano a paset ti bagi ti District Engineer ken naitaray iti Bangui District Hospital para iti pannakatamingna.
Naammoan a nakaro ti pannakadadael ti pick-up truck gapu iti napasamak a disgrasia.
