LAOAG CITY – Inbatad ni Atty. Bernie Constantino, dati a Presidente ti Integrated Bar of the Philippines ditoy Ilocos Norte nga adda ti nagduduma nga epekto ti kalikagum ni Department of Justice Secretary Jesus Crispin Remulla a maibaba ti piyansa dagiti marigrigat nga akusado.
Segun ken ni Constantino, ti pagpintasan iti kalikagum ni Remulla ket makakissay iti bilang dagiti mabalin a maipisok iti pagbaludan.
Kuna na a nu nabababa ti piyansa ket al-alisto nga isapulan dagiti marigrigat nga akusado ti pagbayad ken saan a maibayag a mapatgan ti temporaryo a pannakawaya-waya dagitoy.
Kabayatanna, inbatad ni Constantino a saan a maikkat ti posibilidad a ti pannakaibaba ti piyansa ket mabalin nga isu ti ad-adda a gundawayan dagiti akusado nga aglabsing iti linteg.
Immuna iti daytoy, inlawlawag ni Constantino nga ado ti klase ti piyansa.
Inpakaammo na a mabalin a maited ti temporaryo a pannakawaya-waya dagiti akusado nu dagitoy ket makaited ti property, recognizance wenno cash bond.
Mainaig iti daytoy, inpakaammo na a nu bilang maibasura ti kaso a naipila kontra iti akusado ket mabalin a maisubli ti naited a piyansa babaen ti panagipasa ti motion.
Innayun na a kas maysa nga abogado ket masapol a sapasap ti pannakaaplikar ti napababa a piyansa kadagiti amin nga akusado.
