LAOAG CITY – Direkta nga inrakurak ni Bombo International News Correspondent Irene Calamaan, tubo ken agnanaed ita idiay Massachusettes a ni President Donald Trump ti butos na.
Segun kenni Calamaan, daytoy ket gapo ta napintas ti stock market da wenno pakaseknan iti ekonomiya uray adda ti nagbabaan na iti laksid nga adda pandemya.
Inbatad na nga ado pay dagiti polisiya ni Trump a napintas para iti pagilyan da ken maysa pay a naaramidan na ket ti pannakapaiget ti iligal nga agnanaed iti Estados Unidos.
Kunana a pinanunot wenno iprayprayoridad laeng ti agdama a presidente ti pada na nga Amerikano.
Inpetteng na pay a saan a racist ni Trump gapo ta makita na pay a nasayaat iti kaadoan iti laksid ti pagsasao na a bastos para kadagiti sabali nga Amerikano.
Maysa pay iti nangayatan na kenni Trump ket ti panagngato ti rate ti addaan ti trabaho.
Mainaig iti daytoy, kuna ni Calamaan a dagiti mangibagbaga a saan a napintas ti panangtengngel ni Trump iti pandemya ket isu dagiti kontra iti plano ken saan da a kayat a mismo ti presidente.
Kunana pay a ni Trump ket saan a politiko no diket maysa a negosyante a presidente.
Kabayatanna, kuna ni Calamaan a saan kuma a ti pagbasaran ti panagbutos ket ti pananggura iti tunggal maysa dagiti aglaban iti kina-presidente ti Amerika.
